Mwenge wasisitiza utunzaji wa mazingira

Utunzaji wa mazingira unapaswa kupewa kiupaumbele hasa kwenye vyanzo vya maji ili kuweza kuongeza upatikanaji wa maji safi na salama kwa wananchi.

Hayo yamesemwa na Kiongozi wa Mbio za Mwenge wa Uhuru Kitaifa mwaka 2021, Luteni Josephine Mwambashi alipotembelea utunzaji wa chanzo cha maji cha mto Kizinga na kupanda mti katika chanzo hicho kilichoanza mwaka 1950 ambacho kina uwezo wa kuzalisha maji kiasi cha lita milioni 7 hadi 9 kwa siku.

Amesema Mamlaka ya Majisafi na Usafi wa Mazingira Dar es Salaam (DAWASA) kwa kushirikiana na wananchi wanapaswa kuwa walinzi bora kwenye kulinda vyanzo vya maji, kwani vyanzo vikikauka hakutakuwa na haja ya kuwepo kwa mamlaka hiyo.

Ameongeza kuwa Mwenge wa Uhuru mwaka 2021 umetembelea chanzo hicho kuona uwezo wake wa uzalishaji wa maji pamoja na kuhamasisha upandaji wa miti kwenye vyanzo mbalimbali vya maji.