Simba wanaongoza Ligi Kuu Tanzania Bara wakiwa na alama 65 baada ya mechi 25, wamepania kuhakikisha mchezo dhidi ya Azam unakuwa ni maandalizi kwa ajili ya kukabiliana na mahasimu wao Yanga hapo Jumapili wiki hii.
Akizungumza na Nipashe jijini jana, Sven alisema anatambua mchezo utakuwa mgumu, lakini anaamini matokeo ya ushindi katika michezo mitano iliyopita ni ishara nzuri katika mchezo huo kupata alama tatu.
Alisema yuko makini kukisuka kikosi chake kuhakikisha kila wanapomaliza mchezo wanakuwa na maandalizi ya mchezo unaofuata.
"Kila kitu ni hatua na kwa sasa tulipo si sehemu mbaya, tunahitaji kuona tunapata matokeo mazuri yatakayotufanya tuzidi kuwa imara," alisema kocha huyo.
Alisema malengo yao ni kufanya vizuri katika michezo iliyopo mbele yao ikiwamo huu wa Azam ambao ni mazoezi tosha kuelekea mechi dhidi ya Yanga.
Alisema kwa sasa hawadharau timu yoyote wanayokutana nayo kutokana na kuhitaji kufanya vizuri na kupata pointi kila mechi kwa michezo iliyobaki.
Naye nahodha wa Simba, John Bocco alisema kuvuna pointi tatu katika kila mchezo kati ya mitano iliyopita kunawapa hamasa ya kutafuta alama zingine katika mechi dhidi ya Azam ambayo itakuwa maandalizi mazuri kwa ajili ya pambano dhidi ya Yanga.
"Wachezaji tumejiwekea mikakati ya kutafuta alama tatu, hivyo KMC ilikuwa ni maandalizi ya mchezo wetu dhidi ya Azam, tunahitaji kupata pointi ili tufikie malengo yetu ya kutwaa taji la ubingwa mara tatu," alisema Bocco.
Lakini Meneja wa klabu hiyo, Patrick Rweyemamu alisema: "Tupo vizuri kukutana na Azam wachezaji wana morali kuhakikisha wanatoka na ushindi na kupeleka maangamizi hayo Jumapili.
"Tunaiheshimu Azam ni timu nzuri tumejipanga kuhakikisha hatuwapi nafasi ya kuliona goli letu kirahisi."
Kwa upande wa Azam FC walisema, jana walifanya mazoezi ya mwisho huku kila mchezaji akiwaza ushindi katika mchezo huo.
No comments:
Post a Comment