Wanawake wasio ‘mabikra’ sasa waruhusiwa kujiunga na Jeshi Indonesia

• 

  
  

  Jeshi la Indonesia limeondoa rasmi sharti lililodumu kwa miongo kadhaa la ‘ubikra’ kwa mabinti wanaotaka kujiunga na Jeshi.

  Kwa miaka mingi ili binti ama mwanamke ajiunge na Jeshi la nchi hiyo, alilazimika kufanyiwa vipimo vya ‘ubikra’ kabla ya kuruhusiwa kujiunga, ikiwemo kuingizwa vidole katika sehemu zake za ukeni.

  Sharti hili lilikuwa la lazima, lakini lilikosolewa vikali na wanaharakati likitajwa kama ni la kudhalilisha na kunyima haki ama kuzima ndoto za wanawake wa nchi hiyo wanaotaka kuwa wanajeshi lakini hawana bikra.

  Zoezi hili la kupima ubikra wakati mwingine hufanywa mpaka kwa wanawake walio katika hatua na umri wa kuolewa, na kwa anayekataa huondolewa kwenye mchakato wa kuingia jeshini.

  "Vipimo vya ubikra" ni uyanyasaji wa kijinsia. Hizi sera lazima ziondolewe, "alisema Andreas Hazorno, mtafiti kutoka shirika la kimataifa la kutetea haki za binadamu la Human Rights Watch nchini Indonesia.

  "Kawaida katika kufanya vipimo hivi huwaingizia vidole viwili kwenye sehemu zao za siri kuchunguza kama amewahi kuingiliwa ama kufanya mapenzi na mwanamume," alisema.

  Wanawake wengi waliozungumza na shirika hilo wanasema, zoezi hilo la kupima kwa kutumia vidole ni la maumivu mno na wasingependa kulisikia.

  Kilio cha watetezi hawa na wanawake wa Indonesia, kimesikika na Jeshi limeamua kufuta sharti hilo, na sasa wanawake ama mabinti wanapimwa kwa vigezo vingine ikiwemo afya na uwezo wao wa kuhimili shughuli za jeshi.