Waisrael waendelea kumpinga Netanyahu

Maelfu ya Waisrael wamefanya maandamano hapo jana mjini Jerusalem, ikiwa ni muendelezo wa mikusanyiko ya kila mwishoni mwa juma katika kipindi hiki cha kiangazi, yenye lengo la kushinikiza kujiuzulu kwa Waziri Mkuu Benjamin Netanyahu, ambae anakabiliwa na kesi ya rushwa na kushindwa kulishughulikia vyema janga la virusi vya corona.

Maandamano mengine madogo, madogo yalifanyika pia katika maeneo mengine ya Israel, likiwemo la mji wa Caesaria, ambako kuna makazi binafsi ya Netanyahu.

Katika mkusanyiko mkubwa mjini Jerusalem, waandamanaji walikusanyika katika eneo la kuingilia mji huo na katika makazi rasmi ya Netanyahu, wakiwa wameshika bendera ya Israel na nyingine nyeusi ikiwa ni ishara ya moja ya harakati za kupinga.

Serikali ya muungano ya Israel hivi karibuni ilinusurika kuvunjika baada ya kushindwa kufikia makubaliano kuhusu bajeti.