Simba yataka ubingwa na rekodi ya pointi 100

Wakati ikiendelea kukosa huduma za mawinga wake wapya Luis Miquisone na Shiza Kichuya, Simba itashuka katika Uwanja wa Uhuru leo ikiwa na lengo la kuvuna pointi tatu dhidi ya 'Maafande' wa Jeshi la Polisi Tanzania ili kufikisha pointi 50 kuelekea 100 walizolenga kuzifikia msimu huu.


Hadi sasa Simba ina pointi 47 ikiwa kileleni mwa msimamo wa Ligi Kuu Bara, na mechi hiyo ya leo ni ya kukamilisha mzunguko wa kwanza wa ligi hiyo yenye timu 20.

Ofisa Habari wa Simba, Haji Manara alimwambia mwandishi wetu kuwa lengo la klabu hiyo ni kuandika rekodi mpya kwa kuwa timu ya kwanza kufikisha pointi 100.

"Simba ni timu ya rekodi, tunataka ubingwa na ponti 100, kesho [leo] tunataka kufikia nusu ya lengo, hakuna timu iliyowahi kufikisha pointi 100," Manara alisema.

Mabingwa hao watetezi wa Ligi Kuu, Simba watashuka uwanjani katika mechi hiyo wakiwa na kumbukumbu ya ushindi wa mabao 2-0 dhidi ya Coastal Union, wakati Polisi Tanzania iliwafunga JKT Tanzania bao 1-0, kwenye mchezo ambao ulimalizika siku ya pili kufuatia mvua zinazoendelea kunyesha jijini Dar es Salaam.