Dodoma FC yaibana Mbeya City

Na Ezekiel Mtonyole, Dodoma 

Timu ya Dodoma FC imefanikiwa kutoka sare ya kutokufungana na timu ya Mbeya city inayoshiriki ligi kuu kutoka Jijini Mbeya, katika mchezo wa kujipima nguvu kwa timu hizo kuelekea mashindano mbalimbali kwa timu hizo,  mchezo uliofanyika katika uwanja wa jamhuri Dodoma.

Timu ya Dodoma fc ambayo inayoshiriki ligi daraja la kwanza, na kwa sasa ikiwa inamilikiwa na  halmashauri ya Jiji la Dodoma, licha ya kucheza na timu ngumu ya ligi kuu ilionekana kucheza vizuri kiasi cha kuwaridhisha mashabiki waliokuwapo kushuhudia mchezo huo.

Mara baada ya mchezo huo kocha wa Mbeya city Juma Mwambusi amesifu uwezo mkubwa uliooneshwa na Dodoma fc na kusema kuwa kupitia mchezo huo ameona mapungufu yaliyopo katika timu yake

“Kweli tumepata upinzani mkubwa kutoka kwa Dodoma FC na mbinu ambazo niliwapa wachezaji wangu hazikuweza kufanikiwa kwa sababu timu ya Dodoma fc walikuwa wazuri katika kukaba nafasi ni kipimo kizuri kwetu” amesema Mwambusi.

Kwa upande wake Kocha wa Dodoma FC, Mbwana Makata amesema wachezaji wake walijitahidi kufuata aelekezo yake, na amesema amepanga kutumia timu za ligi kuu ili kuendelea kuimarisha timu yake tayari kwa mapambano ya ligi daraja la kwanza.