Rais wa zamani wa Botswana ahamia chama cha upinzani

Rais wa zamani wa Botswana, Ian Khama, ametangaza kukihama chama tawala baada ya kuongezeka tofauti za kisera kati yake na rais aliye madarakani. Uamuzi huu unatajwa kutishia kukigawa chama tawala kilichoiongoza Botswana tangu ilipopata uhuru mwaka 1966.

Akiwahutubia wafuasi kadhaa katika mji wa kaskazini mashariki wa Serowe jana Jumamosi, Khama alisema atauunga mkono muungano wa upinzani, UDC, wakati wa uchaguzi mkuu utakaofanyika mwezi Oktoba. Mwanasiasa huyo amesema atafanya kazi na upinzani kuhahakisha chama tawala, BDP, kinaangushwa kwenye uchaguzi huo.

Khama aliyesalia kuwa mwanasiasa mwenye ushawishi mkubwa ndani ya chama tawala cha BDP alikabidhi madaraka kwa aliyekuwa makamu wake, Mokgweetsi Masisi, mwaka uliopita baada ya kuingoza Botswana kwa muongo mmoja.

 Lakini tangu alipochukua madaraka, Masisi amekuwa akitofautiana mara kadhaa na kiongozi huyo wa zamani, ikiwemo uamuzi wake wa kuondoa marufuku ya uwindaji wanyama katika mbuga nchini humo iliyowekwa na serikali ya Khama mwaka 2014.

http://bit.ly/30DR1sO