Marekani yamwekea vikwazo waziri wa ulinzi wa Cuba

 

Marekani imemwekea vikwazo waziri wa ulinzi wa Cuba na kikosi maalumu cha wizara ya mambo ya ndani, kwa ukandamizaji dhidi ya maandamano ya amani. 

Rais Joe Biden wa Marekani amesema huo ni mwanzo tu wa hatua za kuiadhibu Havana. Wizara ya fedha ya Marekani imesema ofisi yake ya udhibiti wa mali za kigeni imezuia mali za waziri Alvaro Lopez Miera na kikosi maalumu cha kitaifa kutoka wizara ya mambo ya ndani ya Cuba, kuhusiana na ukiukwaji wa haki za binadamu uliofanywa wakati wa maandamano ya amani mapema mwezi huu.

 Biden amesema Washington inafanya kazi kwa karibu na washirika wa kikanda ikiwemo jumuiya ya mataifa ya Amerika ili kuzidisha shinikizo dhidi ya utawala wa Cuba kuwaachia wafungwa wa kisiasa, kurejesha intaneti na kuruhusu Wacuba kufurahia haki zao za msingi.