Marekani yaweka msimamo kuhusu Taiwan

 

Marekani imeitaka China kumaliza shinikizo lake la kijeshi, kidiplomasia na kiuchumi dhidi ya Taiwan, msemaji wa Wizara ya Mambo ya Nje wa nchi hiyo, Ned Price amesema.

“Tunaihimiza Serikali ya China isimamishe shinikizo lake la kijeshi, kidiplomasia na kiuchumi dhidi ya Taiwan na badala yake ishiriki mazungumzo ya maana na uongozi uliochaguliwa kidemokrasia wa Taiwan,” amesema Price katika mkutano Jumanne wiki hii.

“Tutakabiliana na vitendo vya uvamizi na uchokozi wa China, kulinda maslahi yetu muhimu ya kijeshi, kulinda maadili ya kidemokrasia, kuwekeza katika teknolojia za hali ya juu na kurudisha ushirikiano wetu muhimu wa usalama.”

Price amesema Serikali ya Marekani inaona muungano na washirika wake kama nguvu inayoongeza changamoto mbalimbali pamoja na kuporomoka kwa uhusiano wake na Serikali ya China.

“Tunataka kuhakikisha kuwa tunatembea pamoja na wale washirika wetu, kisha unaweza kutarajia kuwa kutakuwa na ushirikiano katika maeneo kadhaa na China.”

Kwa mujibu wa gazeti la South China Morning Post, viongozi wa sera za kigeni na wataalamu nchini Marekani wanaunga mkono utumiaji wa wanajeshi wa Marekani kuilinda Taiwan ikitokea China imevamia lakini inapingwa na umma wa Wamarekani, utafiti mpya umebainisha.

Katika ripoti iliyochapishwa Jumatatu, Baraza la Chicago juu ya Maswala ya Ulimwenguni limesema kwamba zaidi ya viongozi 900 waliohojiwa pamoja na maofisa wakuu wa matawi, wafanyikazi wa bunge, wasomi, waandishi wa habari na wawakilishi wa vikundi, walipendelea ulinzi wa jeshi la Marekani kwa Taiwan endapo itavamiwa.

Maneno haya kutoka wizara ya mambo ya nje yanakuja wakati Marekani na Taiwan zikiwa zinaimarisha uhusiano wao, China imeonya kwamba “Uhuru wa Taiwan" maana yake ni vita.

Wu Qian, msemaji wa Wizara ya Ulinzi ya China, Januari 28 aliwaonya kwamba watu wanaotaka “Uhuru wa Taiwan” na akasema “wale wanaocheza na moto watawasha moto na kutafuta uhuru wa Taiwan haimaanishi chochote isipokuwa vita.”

Beijing inadai mamlaka kamili juu ya Taiwan, demokrasia ya karibu watu milioni 24 walioko pwani ya kusini mashariki mwa China, licha ya ukweli kwamba pande hizo mbili zimetawaliwa tofauti kwa zaidi ya miongo saba.

Kwa upande mwingine, Taipei amekabiliana na uchokozi wa China kwa kuongeza uhusiano wa kimkakati na demokrasia ikijumuisha Marekani ambayo imekuwa ikipingwa mara kwa mara na China.